黎慧儀、黃詠楓、李美麒 ｜ 帶你走進自然的「言葉」

中心去年邀請三位藝術家，黎慧儀 (Monti)、黃詠楓和李美麒，在中心門前樓梯小路創作「言葉」，希望大家經過這條「看不見盡頭」的小徑時，會發現藝術作品，然後不知不覺走進中心，踏出探索自然的第一步。因為希望能有龍虎山友的參與，三人就拉來一班中心義工大使，行一回碧珊徑，帶同手作紙糊聆聽器，用「六感」體驗自然，然後以詩句寫下當刻所見所感。回來後，他們以天然草木染布，再將大家親手寫的詩句移印布上，以蜜蠟加工防水，再剪成葉子形狀，掛在樹枝、石頭、路旁的花木之中。

作品自年初布置好，由冬到夏，經已慢慢融入、回歸自然之中。近日因為小徑旁的工程，部分葉子「搬家」到中心花園。而除了一路找尋葉上的片言隻語，大家還可在接待處和中心網站，找到完整的詩作和紙糊聆聽裝置。

Monti: 本身都有喺朋友口中聽過中心，兩年前就有上過一次龍虎山。因為中心前面好多樹，位置隱蔽，所以當接咗呢個project，要諗有咩可以加喺小路吸引啲人行入去，但又唔想用太直接嘅方法「就咁畫個箭咀」。於是就拉埋阿楓同美麒，一齊諗點用文字、故事去做創作。

「言葉」將不同元素疊埋一齊，好似人同自然嘅經歷咁，會隨時間流逝，記憶會變淡，呢個作品擺耐咗都會變舊、變爛，大自然嘅loop就係咁。

今次帶中心嘅義工大使一齊行碧珊徑，其實佢哋已經行過好多次、好熟條路。但今次請佢哋試吓focus其中一個感官，又有啲新感受。希望今次活動除咗製作藝術品，都可以幫到佢哋帶導賞時，以新角度介紹龍虎山。

我最推介嘅龍虎山好去處係瀑布，冇人嗰陣好舒服，感覺到有自己嘅空間。

---

楓：我以前住西營盤，都有試過行上山頂，但一直都唔知道龍虎山有個中心。因為今次project第一次入嚟中心，俾我嘅第一印象係呢度好「世外桃源」！

今次創作用到「天然草木染」，做嘅過程會認識到原材料嘅植物，唔係染紅色就買枝紅色顏料咁簡單。成個創作過程印象比較深刻係同大使行碧珊徑，雖然大家都幾了解龍虎山，但一齊作完詩之後都有人話：「冇諗過自己可以寫到咁多嘢！」

美麒：我喺今次呢個製作主要負責文字創作部分。帶中心大使去碧珊徑，其實唔擔心佢地會冇感受，因為平時又聽又睇反而容易忽略細節。今次先叫佢地選擇一個感官，重點用嗰個感官去探索。譬如有人揀咗腳，過程中就要專注感受自己踩到啲咩。沿路都會鼓勵大家停低摸嘢，做啲平時唔會做嘅嘢等等。

行完去到一個涼亭，繼續喺大自然嘅氣氛下寫詩，呢個時候除咗視覺、聽覺、嗅覺、味覺和觸覺外，要用埋「第六感」—直覺，即係感受到咩就直接寫出嚟。最後要朗讀自己寫嘅內容，都有人會覺得尷尬，而我就會話比佢聽：「讀完就冇事～」

碧珊徑係一個好合適激發「六感」嘅地方，因為好近自然但又好近城市，例如一邊有來自大自然嘅流水聲；另一邊又聽到城市機器嘅聲音。好想大家上山都可以多啲放慢腳步感受，見到依家有人播住音樂行山覺得有啲可惜，佢應該唔能夠盡情感受大自然。

楓：我最推介嘅龍虎山景點係瀑布。好多地方都只係遠距離見到個瀑布，但呢度就可以行到好近！

美麒：我最推介都係瀑布，因為好靜同埋有位坐，可以慢慢休息吓。

在地藝術裝置—《言葉》