易琪 | 讓森林浴成為習慣

易琪Amanda是 Shinrin Yoku Hong Kong 香港·森林浴創辦人，曾在患癌期間靠大自然減壓，捱過化療。病癒後才知道原來自己經歷了一趟森林療癒，遂報讀相關課程，成為全職森林浴嚮導。

她在2018年開始與中心合作，推出龍虎山森林浴。當時香港只有幾位認證嚮導，會講廣東話的更是絕無僅有。今天，具相關資格的香港嚮導已逾20人，「森林浴」三個字，亦愈來愈多人聽過。她現在除了繼續帶領體驗、推廣森林浴，更成為了美國自然及森林治療嚮導及計劃協會的培訓導師。中心最近推出的「迷你森林浴」及「森林浴到家」體驗，亦由她設計、培訓。

「雖然多咗人認識，不過我諗香港都係得3成人知道咩係森林浴 / 森林療癒，仲好有發展空間。我2017年開始做，19年左右開始多咗媒體報導，多咗社福機構、醫院選擇呢種方法去服務長者、SEN小朋友、壓力大嘅成年人。之後因為社運、疫情，多咗人關注精神、情感健康，開始感覺到參加者體會到背後價值，唔再只係體驗、試玩。而家開辦連續去4次嘅森林浴，都有人參加。

「其實中心至今仍然係唯一一個我主動聯絡合作嘅機構，因為我鍾意龍虎山同香港大學，希望透過中心將森林浴推廣俾港大人。我係港大舊生，住過龍虎山附近，嗰陣每星期都會上龍虎山兩、三次。

「我會用『友善』去形容龍虎山。因為郊野公園通常好偏僻，但龍虎山好近市區，有好多人，好多小徑，兜黎兜去，一定兜得番去山頂。呢度好安全，可以好輕鬆咁散步，甚至蕩失路，係一個漫無目的、無要求嘅地方。龍虎山亦無好大好大嘅古樹，而係由好多唔同嘅植物、生物，好和諧融洽咁組成呢個生態。

「我最鍾意龍虎山嘅地方係夜晚行山可以見到箭豬（東亞豪豬）。有次同朋友行山遇到，興奮到尖叫，佢望住我哋呆咗，我feel到佢都想尖叫（笑）。然後佢走入草叢，背對我哋，但其實我哋仲見到佢（笑）。我感受到大自然嘅純真！

「同大自然嘅生命互動，令我多咗好多感覺、情感，多咗唔同方式去表達。我以前份人比較實際，而家會聽多啲，學習尊重，唔係淨係睇『有無用』。

「喺香港推廣森林浴5年，呢個已經變成我嘅全職工作。過程中領悟到森林療癒嘅好處，唔只係對人，而係可以成為一個循環，透過令人同大自然建立情感聯繫，觸發佢哋想保護自然嘅心，然後更好嘅自然環境，又可以令人身心變得更好。

「喺香港帶森林浴，最常見係參加者一坐低、放鬆就會瞓著，可能因為香港人真係好大壓力，可以喺森林浴放鬆到都唔係壞事。另外一個有趣現象，就係邀請大家搵個位坐低，好多人會擺出禪修、冥想姿勢，盤腿、條腰坐到好直（笑）；或者好多參加森林浴嘅朋友都有冥想習慣，當然擺咩姿勢係無分對錯。其實森林浴同冥想、禪修好唔同，唔係一種修行，用你自己最舒服、放鬆嘅方式感受就可以！

「我算起步比較早，而家做埋老師，幫手培訓新嚮導。兩者最大分別係，做嚮導同參加者只有一面之緣，做導師就可以見證到學員6個月嘅蛻變，好有滿足感。

「我想繼續深化大家對森林浴嘅認識，一次性活動會做少啲，試多啲唔同角度探討森林浴，亦想記錄香港人同大自然之間嘅故事。我希望森林浴唔止係體驗，而係可以變成大家嘅生活習慣。」

前往中心的森林浴專頁了解更多森林浴資訊 ➤➤➤ https://www.lungfushannaturalist.hku.hk/forest-bathing

Amanda接受過不少媒體訪問，想了解更多可按以下連結 ➤➤➤ 【岑寧兒PodCast - 療癒嚟講呢，森林係一個好地方】 ➤ https://bit.ly/3RDs0rG 【港大舊生介紹 - 大自然的「合伙人」】➤ https://bit.ly/3AUXceZ 【ViuTV -《識碳一定係咁歎》】➤ https://bit.ly/3KWyLlV