文朗晴 | 攝影實習生

文朗晴（Lauren）自少喜愛大海，夢想為保護海洋生態出一分力，中學畢業後前往洛杉磯加州大學修讀海洋生物學。她在回港休暑期間，當上中心攝影實習生。

Lauren：我想透過攝影去帶出大自然嘅美。例如利用微距拍攝，將平時覺得平凡、甚至醜樣嘅動物影到好可愛，好似呢隻千足蟲（馬陸）咁。話俾人知，換吓個角度睇，可能個觀感都會唔同咗。有啲小動物唔仔細留意嘅話好易錯過，令有啲人覺得香港嘅山冇咩生態，我希望我影嘅相可以幫人認識呢啲物種。呢張介殼蟲係我目前最滿意嘅作品，好似世界縮細咗，有少少宮崎駿feel！

我讀海洋生物，本來對香港陸生動物認識唔多，透過喺龍虎山實習，學識辨認呢啲物種。我嘅目標係喺實習完之前可以影到果子狸或箭豬。

疫情爆發，實習期間中心大部分時間閉館，冇咩機會參與活動。但正面啲諗，呢段時間多咗人行山，欣賞大自然，其實都係好事。香港有好多座山，除咗出名嘅景點，都想佢哋留意好似龍虎山呢啲後山仔，景色一樣好正，仲唔洗同人迫添。特別推介龍虎山瀑布，以前上龍虎山都冇留意有條咁長嘅石澗，成個環境好舒服，仲可以睇水澗嘅蝌蚪仔食嘢。

p.s. 行山期間都要注重防疫措施同保護環境，唔好隨地亂拋口罩、垃圾，亦要注意安全。

p.s. 行山期間都要注重防疫措施同保護環境，唔好隨地亂拋口罩、垃圾，亦要注意安全。