小樹林自然教育 | 建立心中的「小樹林」

lfseec
2022年12月15日
讀畢需時 3 分鐘

Matthew、阿泰和星星都曾是中心實習生，他們都不約而同認為當年的實習經驗是讓他們推廣生態教育的初階。於是去年初，他們與同樣在香港大學生態學及生物多樣性學畢業的Melody，一起創立了「小樹林自然教育」（小樹林），設計市區公園探索遊戲，又設計雀仔紙黏土、摺紙、廁紙筒望遠鏡等手工跟大家一起DIY。所有項目構思、教材（道具、錄音）、繪圖都由成員一手包辦，每件事都費盡心思。

「我哋以前係EB莊*莊友，好鍾意香港生態。好多本科嘅考察同學會嘅活動都喺龍虎山舉行，所以我哋都好熟悉呢個山頭。

香港有好多人鍾意大自然，但生態教育質素就好參差。有次去汀角泥灘，見到有綠色旅行團帶住大批遊客，導遊冇介紹任何生態，冇阻止團友拎起海星或貝殼，更冇教育大家呢啲行為有機會破壞生態，淨係時間一到就上車走人。

我哋想令呢個行業更加有價值，不再廉價。香港好多高質素環境教育活動，都由非牟利機構舉辦。相反，好多由公司、旅行社舉辦嘅活動，質素都好差。我哋係透過incubator計劃獲得資金，成立小樹林，希望可以成功以私人公司方式營運，聘請其他相關學科的學生或畢業生，令到更多有專業知識嘅人可以投身呢個行業。

之前見到疫情個個停課，家長都好頭痛唔知可以帶小朋友去邊度玩，於是諗到整一本以親子為對象嘅《小樹林探索手記》，鼓勵大家由屋企附近嘅公園開始，接觸自然。

試過有小朋友話，不如將長頸鹿加入《手記》。可能佢哋主要透過電視紀錄片認識生態，唔知道香港冇長頸鹿，或者以為動物園一定有長頸鹿。呢件事令我諗起，我認識嘅澳洲朋友，佢哋都好了解自己國家本土物種同生態問題。反觀香港，好多人唔了解呢度生態有幾豐富、幾特別。

保育意識應該從小培養，而小朋友嘅行為信念，其實可以反過來影響家長。希望玩過小樹林活動嘅小朋友，無論大個從事咩職業都好，都唔好忘記，用佢地嘅方式去愛護大自然。」

*香港大學生態學及生物多樣性學學會的簡稱

Matthew：

記得做intern嗰陣有份設計一個俾小學生關於城市生態嘅活動，由零開始構思嘅過程，對於我黎講都係一次好寶貴嘅經驗，同埋都發現到城市嘅生物多樣性都唔可以睇少。設計好之後曾經舉行過一次試玩，見到參加者都好開心同埋都好鍾意呢個活動，心裏面都會充滿滿足感。最難忘嘅一次莫過於可以跟Mr. Robert Ferguson同Anthony 夜晚上龍虎山生拍攝生態。除咗有機會睇到專業嘅生態攝影師係點拍攝之後，個晚好好彩咁遇見到10多條（6-7種）蛇，印象非常深刻。龍虎山雖然係香港最細嘅郊野公園，但其實有好多小動物都係居住係裏面。