嗚鴉自然教室 | 對自然嘅驚嘆『嗚鴉（Wuah）』

嗚鴉自然教室（嗚鴉）於2018年由喜愛雀鳥的藝術教育工作者關朗曦Matthew，與喜愛昆蟲的研究員鄭凱靈共同創立。中心推出的全新展覽 「動物的煩惱日常」，就是他們為中心客席策展的成果。展覽以小朋友角度出發，希望透過代入動物處境的小遊戲，令大家可以感受大自然的奇妙之處。

凱靈：「我讀社會科學出身，畢業後喺社福界做咗幾年。2015年，我喺大埔滘無意間發現香港之前無記錄過嘅物種砵裳蛾，自此就好鍾意飛蛾。之後去香港大學讀環境管理碩士，畢業後亦參與有關飛蛾嘅研究。所以一直都有上龍虎山，覺得呢度地理位置令大家可以用較輕鬆嘅方式接近。而且雖然細，但我同事都曾經喺呢度發現過全球新物種。」

Matthew： 「我係浸大視覺藝術出身，好細個就鐘意大自然。畢業後做咗幾年同藝術有關嘅嘢，但感覺並唔係自己最想做嘅。開始諗，點樣可以將藝術同環境結合？」

凱靈：「我同Matthew一齊成立嗚鴉，係有口字部嗰個嗚，代表對自然嘅驚嘆，即係『嗚鴉（Wuah）』一聲！」

Matthew：「今次展覽以小動物嘅日常煩惱為主題，其實都係想拉近家長、小朋友同動物之間嘅距離。有時小朋友返學喺書本上認識動物，會比較難代入，好難感受到其實啲動物面對緊啲咩。

譬如好多人都知道，如果發展濕地，雀仔咪少咗地方棲息囉！但我哋比較少諗嗰隻雀仔，原來佢喺西伯利亞飛去澳洲，途徑香港，遷徙中途仲經歷好多難關......小朋友嚟玩呢個展覽，就可以用第一身角度感受吓。」

凱靈：「亦因為籌辦今次展覽，令我有新發現。為咗了解『蜜蜂超能力（蜜蜂能看見紫外光）』我去咗農田研究，觀察花朵嘅顏色同蜜蜂行為，發現冇昆蟲會喺早上採韭菜花嘅花蜜。白色嘅韭菜花應該幾吸引昆蟲，但竟然日頭冇蟲，反而夜晚有好多昆蟲靠近。咁即係話，好可能佢發出嘅紫外光，只會吸引夜行性昆蟲！」

香港還有好多跟Matthew、凱靈一樣，為香港生態付出的博物學家，Follow呢個IG睇佢哋嘅故事

IG @hknaturalists

➤ Project CROW 嗚鴉自然教室 網站：https://www.projectcrowhk.org/ Facebook: https://www.facebook.com/projectcrow IG: https://www.instagram.com/projectcrowhk/