貓珊|用畫筆連結大自然🦅🐝🦋🌲

近年，不少插畫師愛用畫筆記錄香港，袁明珊（貓珊，Maoshan）絕對是其中一名表表者，她筆下的社區充滿朝氣，人物都是笑容滿面，充滿童真。她跟龍虎山和中心特別有緣，家住港島西，是龍虎山「街坊」，與中心合作過不同類型的企劃，最近更成為常規展覽的共同策展人，以互動方式，邀請大家「抱抱龍虎山」，反思人和山的的關係。

「香港嘅大自然景觀包羅萬有，美不勝收，有山有海、動物、植物、山、昆蟲、海洋、甚至城市、人，所有嘢環環相扣，不可或缺。要我揀最愛邊樣，真係好難揀，如果要揀一樣，我會係樹，我畫嘅城市地圖，都強調樹木嘅重要性。」

「至於同龍虎山結緣，就要由以前份工講起。我曾經從事舊建築保育，鍾意戰前同舊式建築，一直都鍾意龍虎山環境教育中心呢座建築物，亦好鍾意呢度嘅花園。有次我幫見山書店畫聖誕卡，中心職員咁啱睇到，就問我可唔可以幫中心畫。我覺得好好彩，即刻應承。畫作有落雪嘅情景，人同動物都開開心心過聖誕。之後，我仲幫手設計『身森一小步』宣傳圖像、邀請卡等。」

「我最鍾意嘅龍虎山景點，就係中心附近嘅一條小澗。喺攝氏三十二度，烈日當空去到，好似去咗外國嘅世外桃源咁。一邊睇蜥蜴、青蛙，一邊品茶，身心好寧靜。」

「雖然近年越嚟越多人鍾意行山，但唔少人嘅視線習慣停留喺山徑周圍，睇到嘅嘢只係冰山一角。樹上嘅動植物、樹木嘅層次，山徑下嘅泥土，都有待我哋發掘。」

「所以今次『抱抱龍虎山』（Cuddle Lung Fu Shan）展覽，我哋想大家反思人同山嘅關係，因此會問大家，『點解你會行山？』、『行入座山有咩會嚇親你？』」大家可以將答案貼喺牆上。我嘅答案就係大自然好靚，充滿驚喜，但有時無啦啦有條蟲跌落嚟，本能反應就係有少少驚慌......呢啲思考好有趣。」

「另一方面，展覽有四個根據龍虎山形狀製作嘅咕𠱸，畀大家抱抱。我哋習慣喺山中尋求慰藉，但有冇試吓轉個角度，諗吓座山點諗呢？佢屹立多年，人類嘅出現只係過眼雲煙。我哋會諗，人對環境造成幾多破壞？不過山可能心諗，人類只係一粒微塵。思考落去，可能有好多有趣嘅答案。」

「另一個令我好投入嘅活動就係7月同中心合作舉辦咗兩場『動物嘉年華』，開放報名兩個鐘就爆滿啦，估唔到反應咁熱烈！當日小朋友同家長都齊齊扮成動物，有人扮青蛙、獅子和老虎和小葵花鳳頭鸚鵡。不過最令我開心滿足就係活動將大自然、音樂同生活連結起嚟，大小朋友都有得着。」

全新常規展覽「抱抱龍虎山」免費開放

按此了解展覽詳情