Edwin Or | 一見鍾情的感動

Edwin Or是一名自由業設計師，工作時間具彈性，閒時愛攝影，近年喜愛拍攝自然景象。他今年六月誤打誤撞跟龍虎山邂逅，從此對這裏一見鍾情，在他的鏡頭下，曾捕捉過不少昆蟲或生物的美態。短短四個月，他已經上過龍虎山超過十次，變成常客之餘，又十分好學，偶然跟中心的職員交流生態知識。

「我有段時間開始，每年給自己一份『功課』，例如有一年要自己參加大大小小嘅比賽，其中一啲係關於攝影，我參加咗42個比賽，有三個奪冠，其中一個令我獲得2萬元現金獎呢，就係2014年『WMA映香港攝影比賽』，題材關於環保，影低一隻貓身處垃圾堆中，大家嘅垃圾，成為貓之家嘅一部分。」

「近年我喜愛拍攝的主題都同大自然有關，去年我嘅功課係拍攝香港日落美景，有些景象可一不可再，錯過咗某日或某個時刻，便影唔到。後來拍攝大自然的動物上了癮，例如野豬、蜥蜴等，又睇電視節目《蟲前有10個女仔》介紹有趣嘅地方但又唔知道位置，之後再報讀生態攝影課程增進知識，有日因緣際會嚟咗中心，職員推介我去碧珊徑郊遊，先發現節目其中一個拍攝場景就係呢度，即時有種尋尋覓覓終於俾我搵到你嘅感動。」

「我住港島區，平時唔多行山，今年六月第一次嚟龍虎山，每次上嚟都讚嘆呢度好神奇，每次都有新發現，交通方便，唔使行太多路，輕輕鬆鬆；初初嚟到我就係靠中心免費派發嘅地圖做指引，啱晒我呢類初哥，最幫到我係地圖背後畫咗唔同月份會出現嘅物種，例如六月會（可能)見到黑眶蟾蜍，七月有東亞豪豬，八月有領角鴞等等，我真係按住地圖每個月嚟搵呢啲物種，好似玩photo hunt咁，好好彩又俾我遇到！因為我經常出現，連中心職員都開始認得我（笑）！我有時向佢哋請教生態知識，之後不斷睇書，認識大自然嘅不同物種。」

「第一次嚟龍虎山已經遇見中國水龍，佢仲大隻過我屋企隻貓，超級震撼，另外，我仲影咗一種橙色生物，佢哋似紅豆，但唔知佢嘅名，當我上載咗呢張相去社交平台，有啲人睇完覺得好難受，甚至有人喺社交平台unfriend咗我。」

「第二次我由中心步行至薄扶林水塘，睇到一個對好多人嚟講嚇人，但我覺得好靚既畫面，就係螞蟻擔住一隻蟑螂行走，同埋中國水龍脫皮，好難得睇到。仲有一次喺小澗見到南海溪蟹，簡直大開眼界。」

「我嘅拍攝心得係，動作要慢同細，唔好驚動生物，盡量同攝影對象維持喺eye level水平，所以成日蹲低或趴低，為咗影像效果更好，最近仲買咗新相機添。平時我鍾意下午三點後先嚟龍虎山，美中不足係暫時未搵到朋友陪我夜行兼拍攝，有時會覺得寂寞㗎，希望第時遇到同路人啦。」