Ebee & James｜尋找消失的界石

lfseec
2022年4月2日
讀畢需時 4 分鐘

前排好多人講「石頭係有生命架」，不止生命，石頭更蘊含許多歷史故事！

以及龍虎山上的第8塊維多利亞城界石

（編按：該界石位置較險要，不建議大家貿然前往。其實龍虎山克頓道上就有一塊一樣在城界原位的界石，好易去㗎）

走在街上或者山邊，或者也見過一枝枝石造的四方形柱，原來它們都有出處。它們好可能是「界石」，歷史比你我還要年長，昔日一些私人或公家地方，就是以界石來勾劃地界。

較多人認識、民間亦較有系統記錄的界石包括兩類：維多利亞城界石和軍部界石。1903年港英政府決定在維多利亞城（即今天的銅鑼灣至西環一帶）的界線上設立界石（亦稱作界碑），以標示維多利亞城範圍。維城界石為四方柱體，頂部呈錐形，外露部分高約98厘米，並刻有「CITY BOUNDARY 1903」字樣。軍部界石則可追溯到1845年，用作標示軍事地段，較維城界石細小，上面刻有「BO」、「WD」等字樣。軍部界石出現的地段集中在金鐘和九龍半島的中央地帶，龍虎山亦是其中一個重要地點。

去年初，山藝導師兼歷史愛好者Ebee Lam和James Ho成立「香港行跡」，希望訪尋、記錄被遺忘的軍部界石，並整理成公開資料。至年尾，他們突發宣布第8塊維城界石在龍虎山重見天日，更接連引發第9及第10塊維城界石「出土」，哄動一時。

Ebee：「本身都對歷史有興趣，又因為疫情多咗時間喺香港。我哋搵界石係由舊港督山頂別墅開始，之後發現原來仲有軍事界石。一開始搵就發覺蒐集資料好難，唔足夠，又有好多唔同嘅資訊。

有個網站叫Gwulo講香港歷史，嗰度搵到好多有用資料，但佢主要唔係講界石，所以都好零星。於是就諗不如將搵到嘅資料，整理好放上網俾人參考。界石係用嚟框住一個地段，每個地段嘅歷史都唔同，搵到界石，會想知埋嗰個地方嘅故事，擺上網，就可以方便大家去了解。我哋仲制定GIS網站，等大家去搵時可以有正式座標。好多時單靠睇相或者文字形容，比較難搵到。

其實今次係由我哋一位網友兼歷史愛好者Kalvin Chan搵到第8塊維城界石。嗰日佢原本去搵西高山軍事地段一粒因為道路重建而失蹤嘅軍部界石WD24。佢搵唔到WD24，但就發現第8塊維城界石。因為之前好似無聽過有第8塊，於是James就即刻去摷地界圖。」

James: 「最後係喺比較舊嘅英制1:2400地圖上搵到維城界線，對比返佢發現嘅位置，呢塊真係啱啱好喺條城界上面，引證到呢塊界石係喺原位。而且好特別，之前發現嗰7塊界石，都係喺一啲道路同城界交匯點，但呢塊係城界同700尺等高線交匯點，仲係山坡上。界石原來唔係淨係路上面有，亦可能喺城界端點。我哋寫咗出嚟，過幾日就真係有朋友喺摩星嶺同玫瑰崗嘅城界端點，搵到第9同第10塊。

其實我哋會成立香港行跡亦關龍虎山事。因為睇咗中心出版嘅《感知西半山—就是自然》，戴偉思博士寫佢發現大學路邊一個爛水箱，原來係有百幾年歷史嘅文物，好感慨路邊咁多唔起眼嘅嘢，原來都有故事。於是又試吓搵吓，點知真係一搵就搵到舊總督山頂別墅遺址界石。我哋最初搵軍部界石亦係龍虎山、西高山一帶，呢度係同一地方之中搵到最多軍部界石嘅地方。舊地圖紀錄有30塊，依家已經搵到27塊！

有人覺得我哋唔應該公開界石地點，的確自從報導出街之後，好多人嚟尋寶，有人加咗好多標記，又有人斬樹等其他人易啲搵到。我地一定唔會斬樹，亦因為某啲石界處於唔安全位置，亦唔建議一般人自己搵；不過我地嘅立場係首先要俾多啲人知，引起社會討論，先會令相關部門去關注同保育。我地希望相關部門會重視，正正規規起返條路，等大家可以安全地認識呢啲文物。無人知，佢地就會荒廢、俾人破壞......好多界石都係喺發展時，就咁俾人當垃圾推落山，歷史見證就咁就無咗。」