梁志文 | 被昆蟲選中的人

梁志文 Danny（左）- 澳門昆蟲學會會長、 香港大學生物科學學院博士生

Elisha (右）- Danny的實驗室小幫手

「係昆蟲選擇咗我！」人稱「澳門蟻俠」的Danny如是說。2017年，Danny梁志文發現並命名了「澳門細蟻」，是首位在澳門發現新動物物種的昆蟲研究員。他因此獲澳門政府資助來港攻讀研究博士學位，卻沒有從此埋首於學術研究。除了在實驗室中研究螞蟻，他對公眾教育也是不遺餘力，致力將深奧的昆蟲學轉化為一般人也能理解的生活知識。

Danny：我最初係想讀獸醫，結果考唔倒就讀咗昆蟲學，可以話係昆蟲選擇咗我！第一次喺顯微鏡下見到bark beatle（小蠹蟲），令我大開眼界，呢種昆蟲會喺樹木挖隧道，令樹皮表面形成花紋 ，靚到好似藝術品咁。

Year 2嘅時候，我留意到澳門好少關於螞蟻嘅紀錄同圖冊，就開始自己影相、整圖鑑。研究昆蟲令我重新思考生活 -- 就好似生態系統需要多樣性一樣，我搵倒研究螞蟻呢個範疇，都算係擴闊緊昆蟲學呢個光譜。後來繼續喺台灣讀昆蟲學研究碩士，之後又得到澳門政府支持來港跟恩師Benoit*研究，覺得自己好似一隻破蛹而出嘅蝴蝶！

目前我嘅研究主要集中喺郊野公園邊陲地帶，透過考察香港、台北、新加坡等地方，從生物學角度研究唔同城市建構對物種嘅影響。譬如我地會觀察到城市螞蟻嘅體型比較細，而森林螞蟻就帶刺、有殼、比較「惡死」。除此之外，我地仲留意到城市螞蟻嘅品種比較單一，每次出動只會搵倒5-6種，相反森林就可以高達8-10種！原來好多大型螞蟻都適應唔到城市生活，所以發展郊野公園邊陲地帶其實係會令好多物種消失。

世界上有好多奇怪嘅昆蟲，個樣有趣之餘仲對環境好有貢獻，例如幫手運輸掉落嘅果實同種子，繼而播種！但多數人對昆蟲嘅印象都係曱甴同害蟲，我好想改變呢種既有觀念。我會鼓勵學生多同屋企人分享昆蟲照片、做成拼圖post上Facebook，練習用有趣生動嘅方式形容顯微鏡下嘅生物，希望佢哋可以一齊為公眾教育出一分力。

*Dr. Benoit GUÉNARD, 管納德博士，香港大學生物科學學院助理教授

小蠹蟲，俗稱樹皮甲蟲，大部分於生病、枯萎或死亡的樹內棲息及繁殖，於樹皮下活動時會挖出一條條隧道，形成百變多樣圖案。

(Photo Credit: Diana Powell)

Danny收集回來的樣本中，可以找到不同的昆蟲，螞蟻是當中的一大類。

昆蟲分類的工作需要大量人手，Danny便找來港大本科生Elisha幫忙，教她辨認物種的技巧及鼓勵她將實驗室所學的與朋友、家人分享。

還有其他奇形怪狀的生物。Elisha負責辨認、經顯微鏡拍照及將牠們分到不同容器中。

Danny獲康文署批准於市區公園進行研究，在數棵樹上擺放誘餌（香腸）吸引昆蟲。

Danny於台灣求學時期於台、澳兩地進行研究。