Ayumi Adachi | 畫筆定格大自然光影變幻

疫情期間不能外遊，不少香港人想念「第二故鄉」日本。另邊廂日籍藝術家Ayumi Adachi來港住了廿多年，依然好鍾意香港，用畫筆記錄這裡的大自然，最近還在中心合作辦個人展覽「隙光こもれび Komorebi」。

Ayumi在九十年代來港旅行時，便對香港一見鍾情。她說當年日本人在香港容易找工作，1996年便移居香港至今。她對香港的熱愛至今依然歷久常新，談及「真愛」的原因時，只是笑笑說無法解釋。

Ayumi：「日本有好多高山，但我愛城市嘅繁忙同大自然嘅寧靜，鍾意香港交通方便。喺日本，可能坐大約兩小時車先去到郊區。而家我住赤柱，只需坐大概15分鐘巴士就去到中環市區，好鍾意呢個鮮明嘅對比。

「我屋企附近亦有大潭水塘和郊野公園，但我特別鍾意龍虎山！最初睇到介紹呢間中心係一級歷史建築，嚟到參觀後更鍾意成個氛圍，白雪雪充滿歷史感嘅建築物，靜靜哋坐喺小庭園感受一下微風陽光，鳥語花香，大自然景色合併一齊好舒服。

「每次去都好似一次小旅行，令我回憶起童年時喺日本會專程去鄉郊探望外婆一樣，大家坐埋一齊，唔需要特別傾偈交談，但已到經感覺到溫暖。我尤其鍾意呢度位置近巿區，民居、公園和山上無明顯界線，可以融入人群同社區之中，帶俾我更多創作靈感。

「舊年6月開始，我每星期平均都去一次龍虎山畫畫，同呢度嘅天氣、樹木、風、陽光、陰影、時間與環境互動同溝通。日文『こもれび』（意譯：隙光）即是從樹枝同樹葉灑落嘅陽光，我認為日文先最貼切形容呢個現象，展覽個名就係咁嚟。即使落雨我都去，雨水係我畫作一部分，我好歡迎雨水灑喺畫上。人生變幻莫測，我就依大自然規律創作，與大自然同在。我希望透過作品，帶出活在當下，平靜舒服嘅感覺，俾大家一個喘息空間。」

---

Ayumi Adachi 個展 「隙光こもれび Komorebi」

展覽及相關活動均以結束，按此瀏覽展覽回顧