陳少華、易子傑｜細微位先睇得出設計精髓

陳少華Match來自KaCaMa Design Lab，團隊名中的Ma正是他洋名的頭兩個字母。作為產品設計師的他，風格著重可持續性，與中心一拍即合。他的團隊花了一年多的時間，為中心設計品牌形象。

Match：第一次上嚟其實已經感受到中心嘅潛力，有特色、有故事、有details，只係唔夠清晰同統一。

今次為中心設計咗一套資訊指示牌，以往幫商業機構設計，難免要以價錢、速度、效率為主要考慮因素；今次中心畀咗好多空間，我就揀咗中電退役木電線桿做底板，其實唔係特別平嫁，放室外又要額外保養，但就可以真正做到將人、建築、大自然聯繫一齊。室外牌為咗耐用，資料部分用咗金屬，但特別設計成啞面，咁訪客即使喺陽光下都可以睇得舒服。

成個project我最鍾意嘅係分岔路口嘅橙色指示牌，因為見到換咗個牌之後，明顯吸引到平常留意唔到中心嘅行山人士過嚟參觀，見到佢地討論香草、雀仔，覺得一切都值得。

---

易子傑Jacky是Match的老朋友，今次獲邀為中心設計logo及形象。為一個政府及大學聯辦機構設計絕非易事，過程中雖遇上重重難關，最後亦做出各方滿意的作品。

Jacky：一開始花咗好多時間觀察環境、brainstorm，覺得呢度嘅建築好融入大自然，所以希望可以凸顯呢度嘅「和諧」，所以選色都係大自然嘅色彩，唔會做得太「跳」。

龍虎山，分別有兩座山峰組成，logo上確確實實地表達咗呢個外觀。山峰亦似中文「人」字，中間細圓是「人」與「人」牽手的地方，代表中心。外面的大圓就比喻周遭環境，顯示咗人、山、環境之間嘅和諧共處。呢個地方已經堅強屹立咗超過100年，好想佢可以再延續多100年，甚至更多。

我另外特別鍾意今次設計嘅花園細資訊牌，好似我咁高大嘅人，去到郊野公園睇資料成日都要彎低身，好辛苦。呢個牌有彈弓裝置，無論咩身高嘅人都可以輕鬆閱讀，又唔會影響佔地面積，希望大家都感受到我哋設計背後嘅貼心想法。