朱劍虹｜家家有本「蘭」念的經

lfseec
2022年3月26日
讀畢需時 2 分鐘

已更新：2022年3月30日

朱劍虹 Berry 是香港蘭藝會會長，退休前是一名中文老師，現在將所有時間貢獻賞蘭、養蘭，於香港推廣蘭花知識。2009年Berry代表蘭藝會找中心合作舉辦「香港原生種蘭花展覽」，繼而認識中心，於2017年擔任兩屆龍虎山教育大使，後來因為要籌備新書《香港野外賞蘭札記》而暫停中心義工活動。

Berry: 我喺長洲長大，當年仲係燒柴生火，所以啲山斬曬啲樹，光禿禿；之後搬到太子、荃灣，石梨貝水塘就好多馬騮、大帽山就傳聞有山賊，其實唔係好敢成日行；後來搬到半山，就特別感受到龍虎山嘅親切感。我鍾意影蘭花，但蘭花嘅開花期好短暫，以前約好日子上山行3-4次先影到盛開花照，依家網路發達，朋友網上報料：咩咩蘭開花喇，行兩步到龍虎山、太平山就影到，真係好似自己屋企後花園。

香港一共有約130種本土蘭花，物種數量佔整個中國的1/10，如果想證明香港擁有豐富嘅生物多樣性，蘭花絕對係代表！龍虎山至太平山一帶都好多蘭花嫁，包括香港帶唇蘭、高斑葉蘭等，分佈比九龍新界地區較為集中，適合初學者觀賞。

可惜香港人對蘭花保育嘅認識仍然不足，有好多人過分睇重佢嘅經濟價值，想將稀有品種據為己有，如公開確實地點，好多時都會被摘。其實如果想養蘭，唔需要非法採摘野外品種，有好多其他選擇。蘭藝會每年都會提供課程畀會員學習養殖蘭花，透過「玩」蘭花，睇住蘭花成長，可以培養到正面價值觀，其實都幾適合壓力爆煲嘅香港人嫁！真正喜歡蘭花嘅人都會珍惜野外種嘅分佈，所以為咗保護佢哋，暫時都未可以帶大家去睇。

希望未來可以喺香港繼續推廣蘭花保育，由講座開始，介紹物種、生境，慢慢建立港人對蘭花嘅認識。之後想喺動植物公園溫室種植蘭花，俾大家可以親身接觸。教識港人點樣保護野外蘭花之後，長遠想做到好似英國或澳洲咁，有蘭花保育區、有地圖攻略教所有人邊度有蘭花欣賞，等有更多人重視本地蘭花。